龔慈恩憑《那年花開月正圓》在內地爆紅，突然人氣急升，她卻表示：「喺呢個圈30年，仲點會有飄飄然感覺呢！」

劇集《那年花開月正圓》剛於內地播畢，劇中飾演孫儷奶奶「鄭氏」的龔慈恩，憑着純熟的演技爆紅，被不少網民翻出其舊照及訪問。其中在96年TVB劇《西遊記》的「觀音」造型，甚至被網民讚最有「仙氣」。

1984年入讀無綫藝員訓練班而入行的龔姐，演戲足足33年，於1990年離開娘家TVB後，到過台灣及馬來西亞發展，亦曾效力過亞視。近年龔姐主要參與電影和港台劇，直至去年正式進軍內地巿場，對於憑一劇打開內地巿場，經驗老到的龔姐當然未被勝利沖昏頭腦。

她說：「其實真係冇乜感覺，喺呢個圈30年，仲點會有飄飄然或者傻乎乎嘅感覺呢！只係希望繼續接到啲好嘅劇本，演好每個角色，努力做好自己本份先至係目標囉！同埋亦都好明白喺娛樂圈，捉緊每次機遇，比睇番噚日嘅嘢重要。」

對於被年輕一輩粉絲狂翻出以往劇集和靚相，又讚有「仙氣」，龔姐笑笑話：「我哋嗰個年代冇仙氣呢個名詞㗎！淨係有型同型格，比仙氣重要好多嘅。不過，當然都會開心啦！以前咁傻嘅樣大家都會接受，好多謝大家呀！」

談到最初接拍《那》劇，龔姐承認因得知孫儷有份，她說：「孫儷演戲出名好，之前佢有份拍嘅劇質素都好高，對佢選擇都有信心，所以知道佢肯拍，都唔使點考慮。」當然三點五億巨製也是重要因素，她續指：「投資咁大當然準備得好啲，單係啲戲服全部係新，試造型都飛咗上內地幾次，仲要啲衫件件好靚，拍完都未着得晒呀！仲有拍我個仔出殯嗰段戲，為咗搵到啲靚景，導演穿州過省去拍，呢啲咁認真嘅製作真係好難得。」

不過，對於龔姐這類資深演員，能夠有足夠時間空間作準備，才是最難得的安排。她表示：「我演嘅『鄭氏』係個北方人，性格比較剛烈，同我演開南方嘅角色好唔同，我戲裏面好多喊戲，如果冇時間畀我準備，演起嚟會特別辛苦，亦都演唔出啲層次，今次係一個好開心嘅拍攝經驗。」

來源：巴士的報