不少女生都喜歡上網觀看影片學習化妝及美容，經常上載教學影片的美容達人雨僑於接受《巴士的報》專訪時，表示最重視一雙眼睛，並認為有化妝與沒有化妝的眼睛分別很大。

每位女生也愛美，談到最喜歡的身體部份時，雨僑最喜歡的是自己的耳珠，她指別人說耳珠大有福氣，而且即使戴上了很重的耳環也不會覺得很辛苦，因為其耳珠有很多空間。提到身上最著緊的部分時，雨僑指自己最重視一雙眼睛。她說：「因為如果講化妝，其實女仔都幾重視對眼，有化妝嘅眼同無化妝嘅眼差好遠。除咗做嘢，我覺得整好晒眼睫毛、眉毛係一個形象嚟嘅。但平時如果我唔係要做嘢嘅話，我都會好緊張眼、眉。最近好流行去整半永久眉，咁我自己都整咗，變得好輕鬆。日常嘅話，基本上眼妝化好少就得喇。」

不時發掘新鮮事物的雨僑最近發現了一款很好的產品，她說：「我以前唔係咁Buy天然產品，會覺得科學牌子嘅效果比較快。但我最近試咗個產品好得意，係有機嘅紐西蘭牛奶加埋一個有機燕麥片，再加蘋果汁做磨沙，真係非常好。用鮮奶嘅奶粉去磨沙係好滑，而麥片唔會太傷害皮膚，好似我嘅敏感皮膚都用得。」比較過天然產品及科學牌子，現時的雨僑較多使用天然產品，她指：「咁我以前角質厚都唔係好明顯，但自從用咗呢種磨沙方法之後，Keep住用咗有一個月，只要角質一厚少少就會很明顯。最近都多咗留意天然嘅產品，我覺得個效果都係明顯嘅。」

除了外在美外，雨僑認為內在美同樣重要。她說：「我覺得以前好多嘢都無學識，因為大過咗會睇多啲各方面嘅書，同埋o依家上網睇片睇講座，我成日都睇一啲成功人士嘅講座，覺得可以提升內涵同知識。」

來源：巴士的報