《聲夢傳奇》出身的25歲冼靖峰（Archie）、24歲黃奕斌（Hugo）及24歲文佐匡（Sean），以《亞洲超星團》前9名成績，加入男團LOONG 9（玖瓏少年）。團名一曝光即惹來海量負評，又突然加入3位新成員，連首個香港拍手簽名會也未能順利舉行。3子在參賽時早已習慣面對抨擊，更視負評為提升知名度捷徑，對未來發展充滿信心。採訪：杜杜 攝影：朱偉彥 髮型:Hugo Poon@PRIVATE i salon(Archie&Hugo)、Jaffy Wong@k11 Hair Corner(Sean) 化妝:Wasabi Cheung(Archie&Hugo)、Kiya Hung(Sean)@King’s Makeup 場地:The AIR (The ONE)
LOONG 9甫出道已一波三折，3月9日成軍，3月28日突宣布加上張鎬濂，郭殿甲和陳鑫昊，並分為LOONG 9-S和LOONG 9-V，而計劃在4月28日於香港舉辦拍手簽名會，又因不可抗力因素煞停活動。3子身經百戰，Archie認為作為新人，面對不同聲音是必經階段，「最緊要識得衡量自己表演成點，睇你點樣去消化。」
Archie似爹哋開解Sean
Archie覺得《聲夢》由專業評審團隊評核，《超星團》就由觀眾投票，所以後者更加考舞台下的表現，「舞台下面我哋所謂『營業』，點樣令觀眾更加鍾意你，係幾深嘅學問。」跳舞是他最大弱點，他坦認進步得慢，決賽仍冇信心跳得好，擔心會累街坊，「學舞學兩日，第3日全隊人已經跳到成隻舞，我都只跳到3分1，仲有3分2未得。」其他參賽者主動指導，是他最大收獲，「唔係靠自己努力，係靠身邊人願意去幫我，玩呢個比賽最值得開心嘅嘢，一個solo歌手每次唱完，其他歌手唔會同你講邊度唱得唔好，但玩比賽就會有身邊選手話畀你聽。」
Sean排舞時因被換C位大發脾氣踢枱發洩，事後雖有公開道歉，但負評依然不絕，他承認是一個大教訓，「要多謝呢件事，係成長過程，後悔過錯過，下次學識更加好去處理呢件事，令到觀眾見到我嘅成長。」他又多謝 Archie的耐心開解，「Archie似爹哋咁𠱁我，教我下次應該點做，幫咗我好多。」而參賽表現一直平穩的Hugo亦被批評，「覺得我太平均，所有嘢都做到，但冇嘢好突出。」他坦認批評是當頭棒喝，「往往最真實嘅先令到自己去思考，好似會hurt到，但亦都鼓勵自己進步，會醒一醒去面對自己。」
「妙音龍子」要求換名
講到單是LOONG 9團名已惹來超多負評，3子認為對提升知名度反而有幫助，Archie說：「好老實講人哋笑你，其實係幫緊你。」Sean說：「大家未必知入面嘅人，但起碼知道呢個團。」他更搞笑話：「我想做『龍五』或者『龍九』，哈哈！好似型啲，『龍九』嘅話我可以同人講我係『Kowloon』，依家係『龍七』囉！」Hugo更用玄學角度解釋，「我同屋企人都好信風水，好多人講『LOONG 9』運勢好好，就開始鍾意呢個名，最重要個名有反響。」Archie認為團名只是名字，重點應放在表現上，「只要第1首歌好嘅話，大家會鍾意會聽，會繼續睇我哋表演，呢個先係最緊要。」
至於各自的外號，Sean就好鍾意叫「迅猛龍」，「喺《Jurassic World》佢係好聰明又講義氣，查過『迅猛龍』係所有恐龍裏面最聰明，我其實差好遠，都希望真係做到。」Hugo對被封「翼龍」亦好滿意，「呢種龍喺天空飛，好自由，我又好鍾意藍色，天空係藍色我就更加鍾意。」而外號「妙音龍子」的Archie原來曾要求改名，「唔係唔滿意，只係想團隊統一啲，有畀龍字尾嘅名我揀，但就覺得個意思冇呢個咁中，依家一聽個名就係同音樂有關，知道係Vocalist，就用返呢個。」講到未來目標，Hugo和Sean希望成為跳舞和Rap擔當，而身為主唱擔當的Archie，希望隊員能發揮所長，令觀眾記得自己，「團隊越多人，9個、12個，甚至15個人，會對每個人越嚟越模糊，希望過咗1年，我哋出咗幾首歌，有唔同表演後，觀眾望住我哋都有獨特一面，表現到每個人嘅特色。」
《星島申訴王》推出全新項目「我要讚佢」欄目，現誠邀市民投稿讚揚身邊好人好事，共建更有愛社區。立即「我要讚佢」︰https://bit.ly/3uJ3yyF
想睇更多精彩內容，請立即瀏覽「區區有申訴」活動專頁，https://bit.ly/41hgS9E
《星島頭條》新網站有更多精彩內容：http://www.stheadline.com/
追蹤CCUE社交媒體，獲得更多吃喝玩樂生活資訊：
Instagram：https://www.instagram.com/ccue.ca/
Facebook：https://www.facebook.com/ccue.ca
