堪輿學家麥玲玲帶領施焯日（Arthur）及蔡景行（行仔）主持的清談節目《玲玲友情報》，逢周六晚8點TVB Plus（82台）播映。前晚一集邀請了玲玲師傅好友農夫擔任嘉賓，3人一坐低即瘋狂互窒，原本玲玲師傅銳意擔任「狙擊手」，以尖銳問題殺到出名牙尖嘴利的農夫片甲不留，最終反過來成為兩位的夾擊對象！

玲玲師傅好友農夫擔任嘉賓，3人一坐低即瘋狂互窒。

麥玲玲指控農夫是騙徒，指兩人經常要求她轉錢，但純粹搞笑的她講完那番話卻忍不住大笑。

陸永大爆玲玲師傅與某位堪輿學家不和的傳聞。

C君當年任職J2創意總監時，找了蘇民峰師傅擔任J2風水節目主持，令玲玲師傅大呻偏心！

玲玲師傅一開始便強烈指控農夫是騙徒，指二人經常有意無意要求她轉錢，雖然事後有全數歸還款項，但因農夫沒有支付利息，故深感被騙，純粹搞笑的她更忍不住大笑，令農夫好無奈。她再指控C君當年任職J2創意總監時經常玩失蹤，無視她的「搲撈」，找了蘇民峰師傅擔任J2風水節目主持，不過C君強調真正派檸檬者是玲玲師傅，笑言多次致電對方表示有愛情節目等她埋位時，她都以一句「我未返嚟香港喎」為由、以致合作未能成事。C君又細細聲向玲玲師傅隱名爆：「同埋我又唔係搵阿XX（做節目）」，玲玲聞言即激動謂：「咁又係，唔係我就絕交喇。」全程在旁食花生的陸永見狀即大玩「猜猜我是誰」：「有一位師傅佢（指玲玲）唔係好啱嘅，第一性別唔同，第二連個名都唔同。」

農夫提及一件昔日「拜年」趣事，該事件更與蕭正楠扯上關係。

玲玲師傅自爆當初一早已睇好農夫，卻遭自家司機潑冷水，陸永即反擊引來全場爆笑。

此外，他們還提及一件昔日「拜年」趣事，該事件更與蕭正楠扯上關係，事緣被玲玲定位為「冷漠派」的C君，有一年主動提議到玲玲屋企拜年，玲玲師傅說：「有一年過年，佢（C君）係都話要嚟我屋企食飯，以為佢整蠱我，覺得你係唔會無端端話要拜年嘅。」C君聞言即說：「從此咪冇再拜過咯，拜一次年就講一世！去拜年啫，佢就諗住我哋梗係嚟拍嘢。」此時陸永再加一腳：「佢（玲玲）開門見到我哋冇cam man冇剩，失望到呢。」被輪流夾擊的玲玲師傅即提出兩大疑點力撐自己：「第一，係都要去我屋企食，第二，佢（C君）個人好ad hoc（意指即興），嗰次4日前問我攞地址，原來就因為蕭正楠！」

玲玲自家司機負評農夫外表

　　即將迎來25周年的農夫，席間大談當中大計，玲玲即問二人會否考慮改名。之後行仔天真地問農夫：「會唔會搞圍酒？」即時辣着C君，C君說：「你真係覺得我哋毫無音樂價值架喎！」之後眾人將話題扯至有傳聞指C君當年結婚獲玲玲師傅送上價值等同「首期」的人情，對此C君說：「唔知師傅喺邊度買樓，但佢畀我個人情真係做到首期嘅，如果喺明朝。」玲玲師傅又自爆當初一早已睇好農夫，卻遭自家司機潑冷水：「佢兩個好似核爆過後咁，你真係覺得佢哋會紅？」陸永即反擊：「你可唔可以出你司機嘅尊容，我想睇一睇！」