好鍾意睇真人真事改編的電影，因為每次睇親都覺得劇情好離譜、好假，但真實世界確實有發生過，睇到好嬲，然後你會感恩，發覺呢個世界對你原來唔係咁差。電影改編自1971年發生在韓國的一單劫機事件，被迫退出南韓空軍，轉職商用客機副機長的泰仁(河正宇飾)，以一力敵劫機者庸旲(呂珍九飾)，劫機片套路全部齊晒，緊張、驚險、煽情乜都有，機師有型，空姐玉順(蔡秀彬飾)又靚，最重要拍過《白頭山：火山浩劫》的金盛漢導演，將《劫機1971》拍到好有《壯志凌雲》Feel，其實幾驚喜。(上映中) 撰文:廖思慧

由江原道束草機場出發往漢城金浦機場，起飛前泰仁平息乘客紛爭。

當年缺乏安檢，劫機者拎住三個土製炸彈都可以上機。

男主角河正宇在訪談中表示：「《劫機1971》係我拍過最攰嘅戲，因為劇組喺片場搭咗一架真實尺寸嘅飛機，而飛機下面有一個搖晃機，所以真係好似飛緊一樣。」同埋，河正宇飾演的副機長由頭帶到尾，乘客有爭執，勸交係佢、同劫機者談判係佢、連隻揪劫機者都係佢，仲要揸飛機呢，難怪拍到攰嘅。

泰仁希望跟庸旲談判但失敗，後者逼前者下跪。

劫機者庸旲因在南韓被屈坐監，放監後阿媽死埋被逼走上絕路。

高空追逐好刺激
電影有別一般劫機片，描述乘客人性唔算深入，反而因為客機被迫越過休戰線進入北韓時，戰鬥機對民航機發出射擊警告，帶領觀眾進入劇情高潮，民航機不斷閃避戰鬥機，前者360度環迴旋轉，又突然減速令機身垂直後翻轉倒飛，再翻半圈回復水平飛行，好似睇緊《Top Gun》，黐線勁緊張呀。

空姐玉順亦好幫到手，穩定乘客情緒，又幫手救人。

本是空軍的泰仁轉職揸民航機，全靠佢，60名乘客全部獲救。

片長100分鐘，緊張位佔咗8成，難得煽情位唔算過份賣弄，CG特效逼真，故事節奏明快無可挑剔。好多觀眾都覺得疑惑，全機60人，得一個𡃁仔劫機者都制服唔到佢?呢個世界講就真係好無敵。為呢單真實事件感到難過，睇返有關歷史，英勇副機長真係用身體擋炸彈，希望佢嘅後人都能一生平安。

乘客包括呢位袋住成身錢的老細，炸彈一爆，執返啲錢先。

成東鎰(右)飾演機長圭植，劫機後期因傷而睇唔到嘢，要全靠副機長揸飛機。

機長在劫機時一樣保持冷靜，負傷帶領乘客們逃出生天。

由於這款航機早已停產，劇組經過多重考證，鉅細無遺地重塑這款客機機身。

導演有請教現實中的機師，確保飛機飛行時符合現實。

為了表達一觸即發的緊張感，金盛漢導演和幕後人員均有在模擬飛行器上學習操控F-27 民航機和 F-5 戰鬥機。

為讓拍出來的效果更真實，劇組也進行了超過二十次以上的模擬飛行。

所有飛行場面均由從事機師培訓工作的柳在結教授親自指導，確保演員們在操作飛機時呈現出真實感。

電影除了鉅細無遺展現飛機的飛行過程，也拍出空中追逐時令人透不過氣的緊張感。

360度環迴旋轉，亦即「英麥曼迴旋」，也是透過精密計算來判定。

觀眾就如身處片中的民航客機機艙，第一身感受當中的危機。