TVB節目《中年好聲音4》總決賽將於8月23日假啟德體藝館舉行，終極7強名單已經順利訊誕生，包括：尹景順、吳亦偉、尤淑情、許雲妮、許美琪、蔡宓婕和鄭家聲。馬來西亞過江龍尹景順（Eugene）憑藉雌雄莫辨、真假音轉換自如的獨特聲線成為三甲大熱。尹景順近接受網上節目《橙色大笨象》專訪，首度深情剖白十年追夢的辛酸背景、對抗嚴重抑鬱症的經歷，以及他如何練就出一顆「百毒不侵」的強大心臟。
因為能完美駕馭男女聲，尹景順在節目播出後得到不少粉絲支持，這把獨特的聲音為他帶來掌聲的同時，也惹來兩極化的負評，面對這些負評，尹景順則選擇平淡面對：「我成件事我都睇到好平淡。即係，你鍾意，我真係好感激，好多謝大家嘅鍾意啦，鍾意聽我唱歌啦。咁唔鍾意我嘅人呢，其實我都唔會逼你去聽我唱歌嘅，因為大家都係成年人啦，自己鍾唔鍾意聽，或者喜唔喜歡都係自己要去選擇啦，人生係自己，唔需要因為人哋嘅一句話而令自己唔開心。」
尹景順坦言自己是一個頗自卑的人
在《中年好聲音4》的舞台上，尹景順由盲選演唱《身騎白馬》開始，便展現出超班的歌唱技巧，其後尹景順表現極為強勢，因為能完美駕馭男女聲，尹景順雖然獲得不少粉絲支持，但同時有網民留下尖酸刻薄的留言，面對網上兩極的評價，尹景順坦言他其實是一個頗自卑的人：「其實我對自己唔係咁有自信嘅，自卑咗之後我就開始去建立一個諗法，就係呢個世界上係冇人會鍾意我嘅，如果有一個人鍾意我呢，我就應該好開心啦，我永遠永遠都係咁嘅諗法。即係好似食嘢咁囉，有啲人鍾意食魚，有啲人鍾意食雞，咁你冇可能叫一個唔鍾意食魚嘅人去食魚㗎嘛，係咪先？So 其實對我嚟講，我成件事我都睇到好平淡，即係你鍾意，我真係好感激，好多謝大家嘅鍾意啦，鍾意聽我唱歌啦。咁唔鍾意我嘅人呢，其實我都唔會逼你去聽我唱歌嘅，因為大家都係成年人啦，自己鍾唔鍾意聽，或者喜唔喜歡都係自己要去選擇啦。So 我係睇得幾開嘅。所以，好多 bad comments 對我嚟講，其實都唔係咁大嘅打擊，唔會影響到我任何嘅心情。」
尹景順曾因別人的批評而不開心
尹景順的比賽經驗相當豐富，早在2017年，曾參加《The Voice 決戰好聲2017》勇奪殿軍（第四名），亦曾參與大馬標誌性的《Astro 新秀大賽》，最具話題性的是，尹景順早在十多年前就曾遠赴台灣，參加《華人星光大道2》（2012-2013年），當時曾因別人的批評而不開心：「嗰陣聽到人哋唔鍾意我，或者唔鍾意我聽歌嘅時候呢，就會好傷心，嗰陣得失心好重，好好好想贏，好想晉級。咁一輸咗啦，你就會開始懷疑自己、好傷心，連唱歌都唔想唱。長大咗之後發現，點解我要為咗呢啲嘢去整到我自己唔開心呢？因為唱歌始終係我最鍾意嘅嘢，最鍾意做嘅嘢，我最愛嘅嘢。咁唱歌係應該要開心嘅，點解要因為一次嘅失敗，或者一啲人嘅唔鍾意，而唔鍾意自己呢？點解我會成日同好多人講啦，無論如何，你嘅人生係點樣，係你嘅人生，唔好因為人哋講你一句話，就去唔開心，所以就變咗我而家嘅尹景順啦。即係冇咁容易俾人傷害。」尹景順續說：「其實我都算非常非常堅強嘅人。但係呢我都係好脆弱嘅人。點解會講自己好堅強呢？其實好多人表面上越堅強嘅人，其實佢心底就越脆弱，我其實係好鍾意喊嘅人，睇卡通片都會喊嘅嗰種人。」
蔡宓婕讚老公是最強大後盾：
尹景順曾患嚴重抑鬱症
尹景順早在十多年前就曾遠赴台灣讀書兼發展，他曾因為工作問題而患上抑鬱症：「我係非常非常之嚴重，即係我可能一日入邊係會諗十幾次要點樣自殘，或者點樣去自殺呢件事。咁呢件事發生咗，我覺得咁唔得喎，咁我要睇醫生啦。咁我睇咗醫生啦，食咗一日藥之後，我又覺得，唔得喎，呢啲係心理問題嚟嘅，我一定唔可以繼續食藥。咁我就由台灣呢完全搬返去馬來西亞。即係2016年嘅時候啦，我就開始呢，唔畀自己諗咁多嘢。因為我覺得，係好恐怖嗰種感覺，即係你成日覺得你自己唔想喺呢個世界，嗰種自卑感。點解會講 2016 嘅時候，我同而家嘅心態一樣，因為嗰時候我已經帶住我呢個諗法，就係唱好隻歌就好啦，比賽呢樣嘢，淨係要畀大家聽到我唱歌。所以我覺得而家嘅我係可以做心理輔導師嘅一個人。因為自己都已經經歷過，或者可以講，已經完全走晒出嚟。不過我係因為有過抑鬱症嘅人，其實個底都喺度，有時候我都會幾傷心，但係會嘗試轉念囉。即係諗其他嘢，去搞返好自己嘅心情。」
尹景順被視為三甲大熱零壓力
至於被視為三甲大熱，尹景順則說：「我喺呢個比賽入邊完全一啲壓力都冇，決定權唔係喺我身上，參加比賽係一個過程，你只要唱好你隻歌，我哋前面得五個評判，可能呢五個評判都唔認可你，但係可能出邊有 100 個聽眾鍾意你唱歌呢？其實，淨係呢個比賽，淨係得五個評判嚟，決定你嘅生死。咁點解你會因為佢哋畀你嘅分數，或者唔好嘅評語，你就覺得你自己唱得唔好呢？如果你對自己冇呢啲信心嘅話，你就好容易打沉你自己。我成日都講，你只要唱好你自己，生死係佢哋決定嘅，啱唔啱聽都係佢哋決定嘅。咁攞唔攞到冠軍呢件事呢，攞到冠軍喺多咗十萬蚊嘛，係咪？多咗個 title 囉，我又有好多朋友，佢哋喺一個比賽入邊，甚至攞第六、第七名，但係已經做咗，好好紅嘅歌手啦，仲紅過我哋嗰屆嘅冠軍啦。冠軍、季軍都唔喺線上啦。我覺得我已經達到我目標，就係我呢一年入邊已經好多人聽到我唱歌，我已經吸收到好大班嘅 fans，就算到最後，講到我攞到第七名都好，我都冇問題，有人講冠軍價錢比較好，但我又唔等錢使喎，我唔係嗰啲大使大用嘅人喎，屋企冇咩壓力，又唔使供書教學，屋企阿媽又自己煮得好好，夠錢，錢夠用就好啦。唔需要一定要攞冠軍，係咪先？我嘅諗法係咁。」
防止自殺求助熱線：
「情緒通」精神健康支援熱線：18111；網址：https://www.shallwetalk.hk/zh/
香港撒瑪利亞防止自殺會： 2389 2222
生命熱線： 2382 0000
明愛向晴軒： 18288
明愛財困壓力輔導熱線: 3161 0102
社會福利署： 2343 2255
撒瑪利亞會熱線(多種語言)： 2896 0000
東華三院芷若園： 18281
醫管局精神健康專線： 2466 7350
青少年情緒健康網上支援服務「Open 噏」：https://www.openup.hk/service
追蹤CCUE社交媒體，獲得更多吃喝玩樂生活資訊：
Instagram：https://www.instagram.com/ccue.ca/
Facebook：https://www.facebook.com/ccue.ca
