有「港版星野亞希」之稱的o靚模程芷渝（Milla）於2012年出道，短短六年時間，已轉型為多棲藝人，曾演出電影《喜愛夜蒲2》、《低俗喜劇》等，去年更「升呢」擔任網絡電影監製，身份多元化，又不時北上狂接商演、登台騷等，財源滾滾。

據《東周刊》報道，搵到錢的Milla跟家人合資買樓保值，現時在中港兩地共持有三個物業，但由於娛圈工作的時間顛三倒四，她為方便遂決定獨居自住，租住青衣一屋苑的頂樓連天台、總面積約900多呎的單位。她的香閨除了可遠眺一望無際的中環海景外，她更斥資十萬，打造了一間金廁所，因為貪其夠型夠格！

Milla香閨的整體裝修走簡約路線，當中採用較多金色元素，最大特色莫過於金廁所，由馬桶、水箱、水龍頭至毛巾桿等均換上金色，在黑色牆紙的襯托下，型格十足。不過，屋中也擺放了她至愛的Little Twin Stars公仔及物件，增添一份童真，不至於太土豪feel。

Milla透露在此已住了三年，當時只用了一個多月時間裝飾和買傢俬，「之前同家人住，但因為近年成日返內地做嘢，夜歸怕嘈到佢哋，所以搬走。最初，我揀元朗嗰邊，都傾到七七八八，可惜最終個業主反口。咁啱呢間屋係朋友嘅，佢見我搵地方咪租畀我囉，我一睇就好鍾意個景觀，放煙花都睇到o架，至於啲交通都好方便，我過關後行大欖隧道，好快就返到屋企。」

Milla的房間走藍色調，天花板換上藍天白雲的牆紙，猶如置身在天空下，感覺舒暢；最大的反差卻在廁所，採用黑和金的顏色，外表甜姐兒的她似乎也有硬朗的一面。她憶說︰「之前去過間餐廳，見到個金廁所，覺得好得意、好型，所以我自己住，咪整個金廁所囉，連訂造、安裝同買料及其他嘢，都要成十萬蚊。你知女仔貪靚，我化妝、沖涼都喺廁所，留嘅時間都唔少o架。雖然好多朋友都讚，但打理都少少煩，我要成日抹，先可以保持得個馬桶咁金光閃閃。」

來源：巴士的報