簽約Sony旗下廠牌「Green Music」的29歲力臻，曾是中學數學老師，近年憑40吋胸及28吋腰倒三角爆肌身材及寵粉行為，搞到大量女Fans沉晒，在社交平台瘋狂出Po讚好正，就連fans club行政成員都是中學學生的媽咪，他笑言非為吸納粉絲才操大隻。成為妹豬Fans新寵的力臻首談戀愛史，更公開感激女友瞓身支持，有樣又大隻，識唱歌教過書仲要咁深情，你玩晒啦！採訪：杜杜 髮型:Zanki Ng 化妝:Queenie Chan

力臻40吋胸肌和28吋腰的倒三角好身材，確實好吸引。

力臻40吋胸肌和28吋腰的倒三角好身材，確實好吸引。

力臻今年推出第2首派台歌《我的課本留白處》，作為送給學生的最後禮物，因為唔想說教味太重，最終搵填詞人Oscar幫手，「我唔用說教形式教學生，以過來人身份分享多啲，希望佢修飾得冇咁說教，但又有啲message，有種同行感覺。」講起跟學生相處點滴，他最難忘Last Day返學校，「有個中三學生拋個籃球畀我，叫我『阿Sir埋齋』，畀咗個好靚嘅句號，都感動到眼濕濕，教書咁耐總有學生唔鍾意我，但開心有正面影響到啲學生。」

力臻以往唱快歌較多，《我的課本》是他少有的抒情歌。

力臻一直努力分開老師和歌手身分，就算離校前一日都拒絕同學生簽名及合照，「我會話唔識呢個人，呢個邊個嚟？！」他現在是補習老師，承認有學生已變成粉絲，亦有粉絲慕名報讀，「唔止學生，仲有學生家長，fans club嘅行政成員，係中學學生嘅媽咪，佢會帶埋囡囡睇騷，走嗰日都收到啲家長message，話支持我。」

《我的課本》MV，力臻搵來教過的學生演出。

Show胸唔一定色情

未聽過力臻嘅歌，都應該從網上平台睇過佢副40吋胸肌及28吋腰倒三角爆肌Body，力臻覺得場地適合就去做，「沙灘show，唔通着樽領咩？！」熱愛健身的他，認為藝人keep fit是尊重觀眾的專業表現，並非為吸納粉絲，「有時做gym，都會問自己點解會做，係為咗畀人睇定變成生活一部份，呢個好緊要，否則好容易跌落病態，影響飲食習慣同健康就唔好。」

力臻出席《TheNextwave XX24》沙灘音樂節，跟Michael C除衫演出。

對於粉絲Focus佢副「靚偈」，力臻覺得冇所謂，「從藝人角度，唔係做每樣嘢都要做個role model，健身、健美，除咗性感嘅靚亦係健康嘅運動，自律性嘅表現，騷個body唔係色迷迷嘅表現，要令大家想法轉一轉，睇身形唔係色情。」力臻的男女粉絲比例各一半，男粉會飛日本睇騷力撐，騷身材後又多了大量女粉絲，「like數都差好遠，呢個係流量密碼！」女粉急增但力臻未曾收過瘋狂示愛，仲教大家如何溫柔地向偶像表達愛意，「好簡單，影完我再喺IG story打句『佢真係好正呀』，tag埋我，咁我已經睇到，唔使直接send過嚟話『你好正啦』！」

力臻的fit爆身材，亦得到廣告商垂青。

女友力撐做埋助手

談到戀愛史，力臻拍過4次拖，最長一段由中學拍到入行，足足10年，「我哋同一間中學、大學，後尾仲一齊住，到我入行佢都盡量support我，但始終唔同行業。」2017年他本有機會出道，但爸爸突然病逝只能放棄，2021年再有機會他特別緊張，覺得事業行先，「當係二次人生，會擺得好高，一定要做到啲嘢，但有時夜返屋企，佢（舊愛）會有1、2句說話畀我聽，就算我理解佢，都會影響心情，我嗰時做全職老師，收工再做藝人，做啲嘢未必有錢，仲要處理佢嘅情緒，有少少分歧。」

力臻大方談情史，又大讚女友有正職都幫佢做小助手。

力臻慶幸遇到現任女友，身體力行支持他在娛圈工作，「佢做法律有關工作都好忙，但都會做我小助手，我出活動或者做騷，佢一放工都會喺後台幫我影相、補妝，畀到我好大支持，呢個好緊要。」他又認為自己非靠外形吸引女友，「從來唔係大家選擇對方最重要嘅嘢，尤其呢個年紀又一齊住，屋企都唔係依家個樣啦！」不過他承認𡃁仔時期會先被外表吸引，「中學時覺得拍拖要揀個靚，所以點解咁長嘅感情，未必去到最後，因為被對方外表吸引，但相處落未必適合。」

BOX粉絲沉晒事件簿

Threads有好多歌頌力臻嘅Po，香港嘅爆肌男歌手越嚟越多，樂見呢個現象。

粉絲po相大讚好charm。

粉絲留言「睇吓力臻有幾正」。

拍嘢被捕獲兼讚勁靚仔，力臻識玩留言「follow我ig得唔得」。

力臻出活動識做黐住Fans大合照。