藝人鄧健泓早於1991年曾到加拿大留學，2022年攜老婆石詠莉移民卡加利，現已定居當地近四年，生活寫意。日前鄧健泓慶祝52歲生日，竟然「買多間屋」作為給老婆的禮物。

鄧健泓在YouTube上載片段，表示因為老婆熱愛園藝：「喺生日嘅前三日，我決定買多間屋俾我老婆。」因此送「新屋」給愛妻。影片中見到鄧健泓提及因後花園右邊的草地長期處於乾旱狀態，於是靈機一觸決定善用空間，悉心在後花園興建小棚屋（shed）。

他表示：「所以我決定喺嗰度做啲嘢，就係起一間後花園小屋。呢間屋仔可以收納晒大嘅耕種嘅用具同埋材料，等佢耕種嘅時候得心應手一啲。」

鄧健泓不但做足功課，更分享組裝心得，指因為後花園有少許傾斜，所以地基的水平極為重要，更細心提醒網民，起屋仔時要距離鄰居圍欄最少一呎，方便日後走入去清理雜草。鄧健泓亦大讚屋仔可以度身訂造，由風格、顏色、尺寸到門窗位置都可以自己設計，整個興建過程只需六、七個小時就大功告成。

到了新屋落成的「交吉」時刻，鄧健泓幽默地請老婆巡視驗收：「嚟驗貨啦！」石詠莉打開門看到專屬自己的小屋後驚喜萬分，忍不住連續「Wow」了幾聲。

石詠莉滿意地四處打量，更得寸進尺地搞笑問老公：「咦！佢唔會整埋Drywall（石膏板）落去嘅？」鄧健泓搞笑反擊：「你就想喇！我哋可以自己整嘅。」其後石詠莉細心研究屋仔設計：「呢度有個氣口喎，幾好喎！咦，呢個係一個溫室。」石詠莉對這份禮物十分滿意，連聲說：「Love it, love it！」

石詠莉驗收完畢後，急不及待整理耕種用具，以及將材料搬入小屋。鄧健泓起初擔心面積僅6呎乘12呎，空間不夠，但擺放後發現非常實用，能徹底解決老婆的問題。此外，小屋原來還有另一個目的，鄧健泓將愛犬的骨灰擺放在透明櫃中，感性道：「起呢間屋另外一個目的就係為咗佢哋喇，等佢哋隨時都可以走出草地度玩。」他透露搭建小屋成本為5,278元。

相關閱讀：移加3年半成功入籍霸頭位領護照  鄧健泓分享感動時刻難忘一憾事