80年代曾有「紅唇王子」之稱的蔡楓華近日罕有現身翁靜晶的YouTube節目《危險人物2.0》的訪問，翁靜晶指有逾40年未有與蔡楓華見面，今次與好友見面，二人的心情相當激動，翁靜晶一度忍不住落淚，場面相當感人。蔡楓華曾因瘋言瘋語的行徑而被封為「四大癲王」，令到他形象直插谷底，但在訪問上，蔡楓華全程思路清晰，說話有條不紊，兩人除了閒談昔日的合作點滴，蔡楓華亦罕有地澄清了多項纏繞他40年的真相。

蔡楓華近年出席活動經常以黑超造型示人，今次在節目上，蔡楓華罕有摘下墨鏡，展示因重創而視力受損的右眼，他更道出受傷經過，原來與演唱會關。蔡楓華稱在2004年，當時張耀榮在電視公開承諾會再為他開演唱會，結果卻得罪有勢力人士：「又係為咗紅館，因為我知小鳳姐唱唔晒，諗住搵張生（張耀榮），點知又俾人圍。啲幫會人士嚟搵我，佢唔想呢件事發生，佢要保障佢轄下嘅人。」他更罕有除下太陽眼鏡展示右眼傷患並說：「冇盲到，隻眼做咗手術。」

對於多年來被指因為說了一句「一剎那光輝唔代表永恆」遭封殺，但蔡楓華在節目上講到當年真正事業低潮，是因為唱片公司不肯履行出碟配合五場演唱會的承諾，令其1988年紅館演唱會泡湯。多年後，蔡楓華本來有機會與張耀榮合作再開演唱會，殊不知張耀榮在電視公開承諾會再為蔡楓華開演唱會，結果卻得罪有勢力人士，蔡楓華稱：「香港有勢力人士就嚟搵我，你明白未？啲幫會人士嚟搵我，佢唔想呢件事發生，佢要保障佢轄下嘅人。」翁靜晶追問原因：「即係其實有一班唱歌嘅歌星，就係黑社會所控制，如果有10場8場演唱會，就寧願佢哋去好過你去，係咪咁？因為你係冇黨派？」蔡楓華有點不知所措，只稱：「你講到咁明顯，你驚唔驚呀？總之我冇表示意見，我唔知，就係咁喇。」翁靜晶再說：「你唔使驚，我打得，如果佢蝦你，我幫你打，以前我打你，而家我幫你打人。」 蔡楓華無奈地說：「我都係跆拳道黑帶，咪一樣畀人打腫，如果唔係點解要戴眼鏡？」蔡楓華除下眼鏡後說：「冇盲到，但係我做咗手術。（翁：畀邊個打？），係2004年，黑社會囉，又係為咗紅館，因為我知小鳳姐唱唔晒，諗住搵張生（張耀榮），點知又俾人圍。（翁：有冇報警？）你真係問嚟都多餘。」翁靜晶指20、30年前的香港娛樂圈確實黑暗，蔡楓華再透露自己曾在美國被四支槍指住個頭：「嗰次就唔係為咗錢，嗰次係有個女藝人唔知做乜鬼嘢，搞是搞非，煽動啲人、又蝕錢，就上嚟指住我話我有份，我話我冇份喎大佬！我嚟表演咋去大西洋城，就係咁囉，唔想講呢啲嘢喇。」

蔡楓華多年來被冠上「四大癲王」稱號，但蔡楓華自認是斯文人，無花無朵，翁靜晶亦力撐好友的行為良好，蔡楓華說：「我唔埋班，但係唔代表我敵視你哋。每個人都有自己本身嘅嗜好，而家呢個蔡楓華真係嫖賭飲蕩吹五樣都唔關我事，已經幾十年。有啲人我細個應該搵到啲錢，不過我為賣股票，由幾百萬蝕到得番20幾萬。」蔡楓華又稱「四大癲王」這個外號對他影響甚大，不單止工作，甚至連因被打而去報警求助都不獲受理，蔡楓華說：「大佬，用鐵蓮花插我嘅右眼，你知唔知道，如果打低少少， 呢度爆咗，話畀你知，隻眼冇咗，我呢度做咗手術，係創傷性青光眼，右眼視力永久受損。」翁靜晶聞言不禁心痛對方遭遇落淚，並承諾替他翻案，蔡楓華哽咽稱：「你都知我一定經過好多好多嘢，一定出過事，點會因為嗰啲咩剎那光輝永恆，點會係嗰啲咁嘅嘢？一定有事。不過最好唔好搞，連累咗你，呢班人惹唔過。」蔡楓華又憶述當年被打經過，指遭到30多人圍毆：「佢哋有計劃、有組織、有預謀，嗰時我住偏僻地方，佢哋搵個女人嚟話『蔡生，呢排有個男人嚟搵你，問你住喺邊。』首先畀咗一個錯覺你，覺得屋企唔安全，嗰晚我喺澳門，去威尼斯人，唔係賭錢，係想去搵一個Entertainment manager，嗰晚我已經知道危險，因為我返嚟嘅時候，遇到啲的士司機架架都係嗰啲人，我上到去已經驚，就諗住上深圳避一避。」

蔡楓華續說：「上嗰啲巴士，離開咗，後面有七、八個古惑仔喺度唱《絕對空虛》，跟住我一齊上，過咗關之後去到嗰個位，佢哋就響朵，話『我哋係邊度，你搵邊個同你做紅館呀？』我話『張耀榮先生，得唔得？』嗰陣喺關入面，佢哋唔敢郁手，到我上咗的士，睇吓佢哋會唔會跟住我，冇吖，去一去桑拿地方，諗住睇吓有冇事，一出返嚟，30幾人等我！喺深圳出面等我，喺深圳打我！」蔡楓華稱當時先返香港再到屯門醫院縫針：「我返嚟即刻去咗醫院，嗰時啲CID擺明車馬，話蔡生唔適宜落口供，佢寫嘅全部都係大陸嗰一半，香港嗰一半佢冇嘅，跟住佢睇都唔睇，就俾返封信，我話係common assault（普通襲擊），我就寫返封信話唔係。」在控訴失敗後，蔡楓華坦言不停努力提升社會地位，希望能重新得到注視：「我後尾上咗《勁歌金曲》，我要想辦法提升自己知名度同社會地位，你社會地位太低，等於瞓街邊，俾人打你一身，邊個理你？你個地位已經唔係歌星，個差佬問你咩職業，我話藝人，佢話藝術人呀？已經俾人Underrate晒，一定要提高返自己，起碼行返出嚟，我係歌星嚟喎！唔同晒！」